WAWEKEZAJI WA CHINA PWANI

Ben Komba/Pwani-Tanzania

Wawekezaji kutoka nchini China Jimbo la Jilin wamezuru Mkoa wa Pwani,wilaya ya Bagamoyo kwa ajili ya lengo la kuwekeza katika shughuli mbalimbali za kiuchumi ikiwemo uwekezaji katika maeneo ya uvuvi na ujenzi na Bandari ya Kisasa eneo la Mbegani Bagamoyo.

Ujumbe huo ulioongozwa na Naibu Gavana wa Jimbo la Jilin,BW . ZHONGCHENG SUI amesema wamefurahishwa na kufika kwao nchini Tanzania kwani nchi mbili zimekuwa na uhusiano wa kidiplomasia kwa muda mrefu.

BW.SUI amebainisha kuwa Tanzania na China zimekuwa zinasaidiana katika mambo mbalimbali ya kiuchumi,kisiasa,kijamii na kitamaduni toka miaka mingi nyuma na kwa kuliona hilo,ujumbe huo unaendeleza yale ambayo yalianzishwa na waasisi wa Taifa hilo la kikomunist la China.

Naibu Gavana ZHONGCHENG SUI amewataka wawekezaji kutoka Mkoa wa Pwani,kutosita kwenda kuwekeza katika Jimbo la Jilin ambalo lina wakazi milioni 28 na fursa ya uwekezaji katika maeneo ya miundo mbinu ya usafirishaji na maeneo mengineyo, na amechukua hatua kuupongeza mkoa wa Pwani kwa kudumisha utawala bora.

Mkuu wa mkoa wa Pwani, BIBI.MWANTUMU MAHIZA  aamesema ujio wa wageni hao kunafuattiwa ziara waliyofanya viongozi wa mkoa katika Jimbo la Jilin,nchini China ambapo walipata fursa mbalimbali za kuweza kuona jinsi gani wenzao wanavyoweza kuendesha mambo yao kwa mafanikio.

BIBI.MAHIZA ameongeza ni vizuri mkoa wa Pwani ukawapokea wawekezaji hao kwa lengo la kupata uzoefu na kutambua mbinu ambazo zinaweza kuwasaidia Watanzania kukuza uchumi na kutoa ajira katika kuharakisha maendeleo ya taifa.END