WALAMIKIA MALIPO KIDUCHU HALMASHAURI YA MJI WA KIBAHA

Ben Komba/Pwani-Tanzania/7/28/2014 6:16:35 PM

Watumishi wa kitengo cha mazingira halmashauri ya mji wa Kibaha wameendelea kulazimika kufanya kazi kwa kima cha mshahara wanacholalamikia ambacho wao hawakubaliani nao.

Mwandishi wa habari hizi amewashuhudia watumishi hao wakifanya kazi hiyo jana ikiwa ni sehemu ya wajibu wao kuhakikisha kuwa nji wa Kibaha unakuwa safi muda wote sambamba na uwepo wa gari la kisasa la taka.

Nimebahatika kuongea na watumishi hao wa mazingira ambao walikuwa na mambo kadhaa ya kuelezea, Mmoja wa BW.KASSIM MALIVI amesema wao wanalipwa shilingi 125,000/- kiwango ambacho hakitoshelezi mahitaji na kulinganisha na uzito wa kazi wanayofanya.

BW.MALIVI  ameongeza wamepeleka malalamiko yao sehemu mbalimbali wakitaka kuboreshewa maslahi yao, Hatua ambyo iliwafikisha hadi ofisi ya Mkuu wa wilaya ya Kibaha BI.HALIMA KIHEMBA ambaye aliaahidi kulishughulikia suala hilo kwa karibu.

Naye mtumishi mwingine BW.JUMANNE KADALA amesema kuwa yeye anaipenda kazi yake na kuna kitu kidogo kinachomkwaza ambacho ni kiwango kidogo cha malipo wanayopewa na halmashauri.

BW.KADALA ameenda mbali na kuiomba halmashari kuwaongezea mshahara hadi kufikia shilingi laki moja themanini za Kitanzania, ili waweze kujikimu na hali ngumu ya maisha inayowakabili watanzania walio wengi.

Mwandishi wa habari hizi alipoongea kwa njia ya simu na Mkuu wa wilaya ya Kibaha kuhusiana na suala hilo, alikiri kulifahamu na tayari ameshalifanyia kazi kwa kuwasiliana na Mkurugenzi wa halmashauri ya mji wa Kibaha kwa ufumbuzi.

END.