MEI 23 SIKU YA FISTULA ULIMWENGUNI

Ben Komba/Pwani-Tanzania/22/05/2016 09:53:51

Maadhimisho ya siku ya Fistula ambayo yanatarajiwa kufanyika Mei 23 mwaka huu Mashirika yanapambana na tatizo hilo nchini yamelenga katika kuhakikisha wanafanya kazi kwa karibu na vyombo vya habari ili kuweza kufikisha elimu juu ya ugonjwa huo kwa jamii.

Mwakilizi msidizi wa shirika la Umoja wa Mataifa UNFPA nchini, BI. CHRISTINE MWANUKUZI KWAYU amesema kwa kushirikiana na vyombo vya habari kutawezesha wanawake wanaoishi na tatizo la Fistula kujitambua na kuchukua hatua sthahili.

BI. KWAYU amebainisha kuwa takriban wanawake milioni mbili wanaishi na tatizo hilo ulimwenguni na inakadiriwa wanawake takriban 800 wanafariki dunia kwa tatizo la fistula kwa mwaka.

Aidha amefafanua Mwakilishi msaidizi huyo wa UNFPA nchini, BI. KWAYU kuwa athari ambazo zinawapata wagonjwa hao ni pamoja na kunyanyapaliwa na jamii kutokana na hali ya kutokwa haja bila kujitambua.

Akizungumzia kuhusiana na kundi ambalo linapata kwa kiasi kikubwa tatizi hilo  ni wasichana ambao wanabeba mimba za utotoni, hatua ambazo UNFPA imezichukua mpaka sasa ni kutoa elimu ya kwa wahudumu wa afya 4000 na kutoa usaidizi katika masuala ya uzazi wa mpango.

BI. KWAYU ameitaka jamii kuwapeleka watoto wa kike shule ili kuwaepusha na mimba za utotoni ambazo ndio chanzo kikubwa cha ugonjwa wa fistula kwa kinamama.

Mashirika mengine ambayo yanaunganisha nguvu katika kupambana na tatizo la Fistula ambalo linasemekana kuwa korofi katika maeneo ya Afrika Kusini mwa Jangwa la Sahara na Asia ni CCBRT, AMREF kwa kutoa usaidizi tofauti ili kuweza kushinda tatizo linalowezekana kumalizwa kabisa.

END