MGOMBEA KUTATUA MIGOGORO YA ARDHI BAGAMOYO.

Ben Komba,Pwani-Tanzania/9/28/2015 10:59 AM

Mgombea wa udiwani katika Kata ya Vigwaza wilaya ya Bagamoyo,Jimbo la uchaguzi Chalinze amewataka wananchi wamuunge mkono katika uchaguzi mkuu ujao kwa kumpigia kura ya ndio ili aweze kuwasaidia katika kutatua kero mbalimbali zinazowakabili.

Mgombea huyo, BW.SADALAH CHACHA amewahakikishia wapiga kura kuwa watakapomchagua hawatajutia kura yao na hivyo amewasihi wamkopeshe kura zao ili aweze kuwalipa maendeleo.

BW.CHACHA amefafanua kuwa kwa muda mrefu wananchi wa Ruvu darajani wamekuwa kama yatima na kila mwenye nguvu kuonyesha uwezo wake katika kijiji hicho na kutolea mfano wa uvamizi wa ardhi unaofanywa na wageni ili hali wenyeji wakiwa hawana ardhi ya makazi na kilimo.

Amepingana na dhana ambayo serikali ya CCM inatumia ya kugawa maeneo kwa watu wanaovaa joho la uwekezaji ikiwa wanajua sio wawekezaji na wanapofika vijijini wanawalaghai wananchi kwa ahadi hewa ambazo mara nyingi hazitekel;ezwi ikiwa kama nitawajengea shule au zahanati.

Naye mgombea nafasi ya Ubunge kupitia tiketi ya UKAWA,BW.MATHAYO TORENGEY amesema kuwa yeye ni mgombea anayewania kiti hicho akishindana na mtoto wa Rais ambaye biashara anazofanya zinajulikana.

Amefafanua kuwa  anawaomba wapiga kura kufika Chalinze na wajionee wenyewe jinsi gani familia ya mkuu wa nchi inavyodharauliwa kutokana na wananchi kutoridhishwa na yanayofanywa na familia hiyo.

BW,TORENGEY amewaomba wapiga kura kumchagua yeye akawawakilishe Dodoma bungeni ili kuweza kutatua kero zilizopo kama ujenzi wa Kituo cha afya kwa ajili ya kuwasaidia wagonjwa na majeruhi wa ajali ambazo zinajitokeza mara kwa mara, ahadi ambayo mbunge wa sasa ameshindwa kufanya.

END.