MWEKEZAJI APIGWA STOP RUVU DARAJANI

Ben Komba/Pwani-Tanzania

Wakazi wa Ruvu Darajani wilayani Bagamoyo kwa kauli moja wameamua kumsimamisha mwekezaji kuendeleza eneo ambalo inadaiwa amelipata kinyume cha taratibu.

Uamuzi huo umefikia baada ya kufanyika mkutano wa kijiji kujadili ugawaji holela wa ardhi na kusimamiwa na mtendaji wa Kata ya Vigwaza BW.MASKUZI MASKUZI ambaye kwa upande alikiri kuwa makosa yamefanyika katika utoaji wa ardhi katika eneo hilo ambalo wananchi wanalalamikia.

BW.MASKUZI alitoa fursa kwa wananchi kutoa maoni yao kuhusu hatua gani zichukuliwe katika kuhakikisha suala hilo linatatuliwa kwa haraka bila kuleta uvunjifu wa amani katika kijiji cha Ruvu Darajani kama hali inavyojionyesha kwa sasa.

Wananchi wakichangia kuhusu suala hilo, BW.ATHUMAN MKALI alikumbushia ujio wa Mkuu wa wilaya ya Bagamoyo, BW.AHMED KIPOZI wakati wa mkutano wa kuondoa uongozi uliopita kutokana matatizo ya ardhi ambapo alionya uongozi wa mpito usiguse kabisa masuala ya ardhi mpaka hapo utakapopatikana uongozi kamilifu.

Naye Mwananchi mwingine ambaye jina lake halikuweza kupatikana amependekeza kwa mwekezaji huyo asimamishwe kuendeleza eneo hilo baada ya yeye kushindwa kutimiza makubaliano ambayo aliyoahidiana na wananchi huku yeye akitumia fursa hiyo kuingiza mamia ya ng'ombe kutoka kusikojulikana, hali ambayo wananchi hawakubaliani nayo.

END.