VIJANA WATAKIWA KUGANGAMALA

Ben Komba/Pwani-Tanzania/2/21/2016 11:56:15 AM

Mkuu wa wilaya ya Kibaha BIBI. HALIMA KIHEMBA ameyataka mashirika yasiyo ya kiserikali kusaidiana na serikali katika kuhakikisha vijana wanatambua wajibu wao.

Ameyasema wakati wa uzinduzi wa mpango mkakati wa utekelezaji wa taasisi ya YOUTH PARTNERSHIP COUNTRYWIDE katika kipindi cha mwaka 2016/2017 ambao umelenga katika uhamasishaji wa vijana katika kujitegemea kiuchumi.

BIBI.KIHEMBA amesema ni wajibu wa vijana wenyewe kuwajibika katika maeneo yao ikiwa pamoja na kutatua kero zinazowazunguka ikiwa sehemu ya uungaji mkono harakati za Rais Magufuli katika kuhakikisha Taifa linapiga hatua za maendeleo.

Naye mwakilishi mkazi wa Taasisi inayosaidia ukuaji wa demokrasia kutoka nchini Marekani NATIONAL DEMOCRATIC INSTITUTE, BW. BODURIN ADEBO amebainisha kuwa taasisi hiyo imekuwa ikisaidia mashirika yasiyo ya kiserikali katika masuala mazima ya utoaji wa elimu ya uraia katika kuimarisha demokrasia na utawala bora katika maeneo mbalimbali.

Akizungumza katika uzinduzi huo wa mpango mkakati wa shirika hilo, Mkurugenzi wa YPC, BW.ISRAEL ILUNDE amebainisha kuwa mwaka huu kipaumbele chao kikubwa itakuwa kuwawezesha vijana kujikwamua kutoka katika lindi kubwa umaskini linalowakabili.

Amebainisha kuwa mbinu ambazo watazitumia ni kuanzisha YPC FOUNDATION ambayo itajihusisha na kuwapatia mbinu vijana juu ya masuala ya kuweka na kukopa.

END.