KONGAMANO LA MAFUTA NA GESI

Ben Komba/Pwani-Tanzania/21-03-2014/11:33

Watanzania wametakiwa kutobweteka kutokana na taarifa za kugunduliwa gesi na mafuta maeneo mbalimbali ya nchini kwani rasilimali hiyo haibaki milele, na kutoa msisitizo kuendelea kufanya kazi za uzalishaji mali kwa bidii katika sekta zote ili kujenga uchumi endelevu.

Katibu kiongozi Ikulu, BALOZI OMBEN SEFUE ameyasema hayo wakati wa ufunguzi wa kongamano la viongozi wa Mkoa wa Pwani kuhusu Rasilimali  gesi asilia, Mafuta na madini kwa amani na maendeleo ya Tanzania lililofanyika mjini Bagamoyo mkoa wa Pwani.

BALOZI SEFUE amewakumbusha Watanzania kuwa Tanzania bado ni nchi maskini na tukipata tamaa kuwa tupuuzie sekta nyingine kama elimu, kilimo na harakati nyingine za kiuchumi au kila eneo ambalo linakuwa na rasilimali za gesi na mafuta kuamua kuhodhi utajiri huo nako kunaweza kuleta magawanyiko kama taifa.

BALOZI SEFUE amekubaliana na dhana ya rasilimali inayopatikana eneo husika kuanza kunufaisha wakazi wa hapo lakini sio eneo husika kuhodhi kabisa rasilimali hiyo pekee bali rasilimali yoyote inayopatikana iwe kwa faida ya Taifa zima kwa lengo la kujenga mshikamano.

Amebainisha mpaka sasa serikali imeshauunda kamati maalum ya wataalam ambayo itakuwa na wajibu kutafuta mbinu bora za mgawanyo wa mapato yanayotokana na rasilimali ya mafuta na gesi.

BALOZI SEFUE amekazia kuwa Watu makini na waaminifu wenye weledi wa kusimamia na kuendeleza rasilimali ya nchi wanahitajika ili kuweza kufikia malengo tuliyojiwekea.

Akizungumza katika kongamano hilo Mkurugenzi mtendaji wa Shirika la Petrol Tanzania, BW.YONAH KILAGANE amesema ujazo wa gesi iliyopo nchini ni sawa na mafuta ghafi takriban ya ujazo wa tani bilioni 1.1 au mapipa bilioni 8.835.

BW.KILAGANE amefafanua kuwa maeneo ambayo imegunduliwa gesi ni Mkuranga katika mkoa wa Pwani, Kiliwani,Songosongo, Mnazi Bay na Ntorya na ili gesi hiyo iweze kutumika hakuna budi kuwepo kwa miundombinu madhubuti ya shughuli.

Ikiwa pamoja na mitambo ya kusafishia gesi, mitambo ya kusafirishia gesi-bomba au meli maalum na kubuni mradi mkubwa ambao utaweza kutumia gesi hiyo kwa lengo kuimarisha uchumi wa nchi na ili kukamilika hatua  hiyo inachukua miaka takriban 9 mpaka 12.

END.