WATENDAJI WAONYWA KUHUSU UZEMBE

Ben Komba/Pwani-Tanzania/10:40/29-06-2013

Mkuu wa Mkoa wa Pwani BIBI. MWANTUMU MAHIZA amewaonya watendaji katika halmashauri ya wilaya ya Kibaha kufanya kazi kwa bidii na uwajibikaji kuepuka kuwajibishwa na serikali.

Akizungumza katika kikao maalum cha baraza la madiwani halmashauri ya wilaya Kibaha, BIBI.MAHIZA amebainisha kuwa wakati wa kuoneana aibu umepita na kila mtu atawajibika kwa uzembe ambao ataufanya.

Mkuu wa mkoa wa Pwani , BIBI.MAHIZA alianza kwa kuwaonya watendaji hususan wa ardhi ambao wamekuwa ndio chanzo kikubwa cha migogoro na wanapohamishwa wanaacha malumbano ambayo hayana tija ambayo mengine yanatishia kusumbua hali ya amani na utulivu uliopo.

BIBI.MAHIZA ameelezea na kuchukizwa kwake na mgogoro unaoendelea katika kijiji cha Kisabi ambapo maofisa ardhi kwa makusudi wamepima viwanja katika maeneo ya watu bila kuwashirikisha wamiliki wa maeneo hayo, ambapo kuna maeneo yameuzwa kwa watu zaidi ya sita, jambo ambalo amesema halikubaliki.

Kutokana na kujitokeza kwa hali hiyo Mkuu wa mkoa wa Pwani ametoa siku 31 kwa wahusika wampatie majibu sahihi kutokana na kadhia hiyo.

END.