VIDEO=DKT MAGUFULI AOMBWA KUTANUA WIGO WA ELIMU YA BURE.

Ben Komba/Pwani-Tanzania12/10/2015 8:57:17 AM

Rais wa Jamhuri ya muungano wa Tanzania DK.JOHN POMBE MAGUFULI ameombwa kutanua wigo wa utoaji elimu bure kuanzia ngazi ya awali mpaka Chuo kikuu ili kutoa fursa ya kupatikana kwa maendeleo kwa haraka.

Mkurugenzi mtendaji wa shule ya awali ya  ANNE MONTESSORI PRE-PRIMARY SCHOOL, BI. ANNE MASAKA MAYOMBI ameyazungumza hayo wakati wa mahafali ya nne ya shule hiyo, ambapo amebainisha kuwa kwa kufanya hivyo kutasaidia kukuza kiwango cha elimu nchini.

BI.MAYOMBI ameongeza kuwa yeye kwa upande wake amefurahishwa na hatua ya kutangazwa kwa utoaji wa elimu bure, ingawa amependekeza kuwa utoaji wa elimu kuambatane na kuboresha maslahi ya Walimu.

Amehimiza iwapo kama serikali itatoa ruzuku kwa shule za awali na kuwalipa Walimu ambao wameamua kujiajiri baada ya kupata mafunzo ya Ualimu na kukosa ajira, suala hilo litapata mafanikio makubwa.

Mgeni rasmi katika hafla hiyo, Mchoraji maarufu wa katuni nchini, BW.MASOUD KIPANYA akizungumza amesema wazazi wana wajibu wa kushirikiana na Walimu kuhakikisha watoto wanapata elimu bora ambayo itawawezesha katika maisha yao ya baadaye.

BW.KIPANYA amesikitishwa na risala ambayo imesomwa mbele yake kwa baadhi ya wazazi kutowathamini watoto na hivyo kuathiri maendeleo ya elimu mtoto.

Hivyo amewataka wazazi kubadilika na kuthamini watoto na walimu, na akasisitiza kama unataka kulea Rais mzazi hana budi kumthamini mtoto kwani wao ndio viongozi na Taifa la kesho.

END