WACHIMBA MCHANGA MJINI KIBAHA WALALAMIKA-VIDEO

Ben Komba/Pwani-Tanzania/2/6/2015 4:38:19 AM

Wakazi wa mtaa wa Miyomboni katika halmashauri ya mji wa Kibaha wamejikuta katika wakati mgumu baada ya halmashauri kuwakabidhi wawekezaji wakubwa shughuli ya uchimbaji mchanga katika eneo lao na wao wakikosa shughuli ya kuwaingizia kipato.

Mmoja wa wachimba mchanga ambaye nimebahatika kuongea naye, BW.NOEL KITIMBWISI amesema kuwa kwa muda mrefu wakazi wa eneo hilo wamekuwa wakitumia machimbo hayo kama ajira binafsi na kuwawezesha kujikimu na changamoto mbalimbali za maisha.

BW.KITIMBWISI ameitaka halmashauri ya mji kuangalia haki za wachimbaji wadogowadogo badaala ya kutotoa fursa kwa kundi hilo kubwa ambalo lina vijana wengi na kinamama ambao wamejiajiri katika sekta hiyo ya uchimbaji wa madini ya mchanga.

Ambapo kinamama wanafaidika kwa kupika mamalishe na kujipatia riziki, lakini hali imebadilika toka mwekezaji huyo alipofika eneo hilo bila wao kushirikishwa na kuleta kijiko ambacho kwa njia moja au nyingie imeathiri kwa kiasi kikubwa kipato cha wenyeji.

Naye BI.WEMA MFAUME mama lishe katika eneo hilo amesema leo ni siku ya pili wamekuwa wakipata hasara kutokana na wachimba mchanga wadogowadogo ambao walikuwa wanawategemea kama wateja wao wakubwa kushindwa kununua chakula kutoka kwao kutokana na mabadiliko ghafla yaliyojitokeza.

BI.MFAUME amebainisha kuwa ni vyema serikali ikaliangalia vizuri suala la wawekezaji kwa kuweka sheria ambazo zitawalinda wenyeji w eneo husika, ili kutoa fursa kwa kila mtu kula kwa urefu wa kamaba yake.

Naye mwekezaji anayelalamikiwa, BI.AGNES FRANK amesema kuwa yeye amekodisha eneo hilo kwa madhumuni ya kuchimba mchanga na kuuza kwa wenye malori na hatua ya wachimbaji wadogo kuzuia magari kuingia machimbo kuchukua mchanga ni kitu cha kushangaza.

BI.AGNES FRANK ameongeza yeye ana vibali vyote vya uchimbaji wa madini hayo ya mchanga, na katika kurahisisha utendaji wake amekodisha kjiko ambacho kinamgharimu shilingi milioni 1.2 kwa siku, kitu ambacho wachimbaji wadogowadogo hawakitaki katakata.

Mpaka mwandishi wa Habari hizi anaondoka eneo la tukio maaskari kadhaa walioshika bastola na Bunduki kutoka kituo cha Polisi Mlandizi walikuwa wanarandaranda kulinda hali ya usalama ili hali ikisemekana kuna wachimbaji wawili wamekamatwa na wanashikiliwa na Polisi.

END