WAUZA MANENO WAONYWA KIBAHA

CCM KIBAHA MJINI YAONYA WAUZA MANENO

Ben Komba/Pwani-Tanzania/17 February 2014/

Wanachama wa chama cha mapinduzi mjini Kibaha wametakiwa kutokuwa madalali wa kisiasa na kuzua makundi ambayo yanhatarisha uhai wa chama katika kipindi hiki cha kuelekea uchaguzi wa mitaa na baadaye wa uchaguzi mkuu mwaka 2015.

Mwenyekiti wa CCM Kibaha mjini, BW.MAULID BUNDALA ameyasema hayo wakati akifungu kikao cha baraza la wazazi Kibaha mjini, ambapo amesema kumekuwa kwa baadhi ya wana CCM kupita huko na huko kutafuta watu wenye fedha na kuwashawishi kugombea nafasi mbalimbali za uongozi.

Mwenyekiti huyo wa CCM amebainisha kuwa cha kushangaza zaidi watu wanaowafuata wengi wao wanakuwa hawana uzoefu katika siasa, na huku wakiwaacha makada wazoefu katika kuwapendekeza katika kugombea nafasi mbalimbali kwa kuwa tu hawana fedha.

Aidha ameongeza CCM imefikia mahali ina madalali wa kisiasa wanaoishi kwa kutegemea kufanya utapeli wa kisiasa, kwa kutumia nafasi yao kama wanachama wa CCM kuuza maneno kwa lengo la kujipatia mkate wao wa kila siku ilihali chama kinamong’onyoka.

Akifunga kikao hicho cha Baraza la Wazazi, Mbunge wa Jimbo la Kibaha mjini, BW.SLYVESTER KOKA amewasisitizia wajumbe wa Baraza la wazazi wa mjini Kibaha, kutotoa nafasi kwa kamati ya wazee katika kusaidia kutuliza baadhi ya sintofahamu zinazojitokeza katika Chama na Jumuiya zake.

BW.KOKA amewataka wana CCM kukaa vikao vya kikatiba ili waweze kuimarisha Jumuiya hiyo ya chama katika kutekeleza ilani ya chama na hapo ndipo watakapoweza kufanya vizuri katika chaguzi zijazo.
END.