BODABODA PWANI WATAKIWA KUJIPANGA.

Ben Komba/Pwani-Tanzania/09/08/2012 12:20:06 Wanajeshi na Polisi wanaomiliki pikipiki zinazofanya shughuli za uchukuzi wa abiria katika maeneo mbalimbali ya halmashauri ya mji na wilaya ya Kibaha wametakiwa kuheshimu taratibu ambazo zimewekwa na chama cha waendesha bodaboda mjini hapa. Akizungumza na waendesha pikipiki wa mjini Kibaha afisa tawala wa mkoa wa Pwani, BI. BEATHA SWAI katika ukumbi wa Mkuu wa Mkoa wa Pwani, amesema wao wanajeshi na Polisi wanatakiwa kuwa mfano bora katika kuheshimu taratibu zilizopo badala ya kutumia nafasi zao katika jamii kufanya mambo kinyume. Hivyo amewataka wamiliki hao kuwaongoza madereva wao katika kuwasisitizia kuheshimu taratibu za chama cha waendesha bodaboda na uongozi uliopo ili kuwezesha kufanya kazi hiyo kwa ufanisi na kwa kuzingatia taratibu zilizopo. BI.BEATHA ameongeza kuwa ofisi yake kwa kushirikiana na halmashauri mbili zilizopo wilayani Kibaha, kutatengwa maeneo maalum ya maegesho ya bodaboda katika kurahisisha udhibiti wa chombo hicho cha usafiri na kuondoa vurugu ambazo hazina ulazima. Naye Mwenyekiti wa chama cha waendesha bodaboda mjini Kibaham BW. ALLY MAANDIKO amesema mpaka sasa chama chao kimeshaanda rasimu ya katiba ambayo wanatarajia kuiwasilisha wizara ya mambo ya ndani kwa ajili ya usajili wa kudumu. BW. MAANDIKO amefafanua juu ya changamoto mbalimbali ambazo wamekuwa wanakabiliana zao ikiwa pamoja na baadhi ya watumishi wa serikali kuingilia utendaji kazi wa chama hicho. Afisa biashara wa halmashauri ya mji wa Kibaha, BI. HAPPY CHINDULI amesema mpaka sasa kwa upande wao zoezi la kutenga maeneo maalum kwa ajili ya maegesho ya pikipiki linaendelea kwa lengo la kuboresha suala zima la uchukuzi, na katika kusaidia kupunguza pengo la vijana wasio na kazi katika halmashauri hiyo. END