MWANAMKE AKAMATWA AKITOA MAFUNZO YA KIGAIDI KWA WATOTO BAGAMOYO

Ben Komba/Pwani-Tanzania/06/10/2016 06:04:43

Jeshi la Polisi katika mkoa wa Pwani linamshikilia mwananchi mmoja mkazi wa eneo la Kimarang’ombe Kata ya Nianjema, Tarafa ya Mwambao Wilaya ya Bagamoyo kwa kosa kutoa mafunzo yanayohusiana na uhalifu  kwa watoto  wadogo.

Taarifa ya Jeshi la Polisi iliyotolewa na Kamanda wa Polisi Mkoa wa Pwani, BOINVENTURE MUSHONGI imemtaja BIBI.ASHURA SAID ambaye ni Mwalimu wa madrassa ya Al rahma alinasa katika mtego wa Polisi kufuatia taarifa ambazo walipata kutoka kwa wananchi juu ya vitendo vyake  vya kuwapa kasumba ya chuki watoto hao.

Kamanda MUSHONGI ameongeza baada ya kupata taarifa hizo Polisi walifanya uvamizi wa kustukiza na kumpekua mtuhumiwa huyo na kufanikiwa kumkuta na bomu moja la moshi lenye namba G2020C SS-STCS katika makazi yake.

Amebainisha kuwa uchunguzi wa awali unaonyesha makazi hayo ambayo BIBI.ASHURA SAID alikuwa anaishi ni mali ya Taasisi ya kiislamuya AKHA LAAGUL ISLAM ambayo imesajiliwa kwa lengo la utoaji wa huduma kwa watoto yatima katika maeneo mbalimbali ya Mkoa wa Dar es saalam, Tanga na Pwani na kinyume chake wamekuwa wakitumia fursa hiyo kutoa mafunzo ya kigaidi kwa watoto hao.

Kamanda MUSHONGI amesema mbali ya kukamatwa kwa mwanamke huyo, Jeshi la Polisi limefanikiwa kuwakamata vijana 22 kati yao 16 ni wasichana na 6 ni wavculana walipokuwa wanajaribu kutoroka.

END.